Kroonwild

<p>’n Wit man soos Paul is so goed soos kroonwild ...<br>In die vorige bedeling was Paul van Heerden se lewe een van gemak: groot huis<br>in Pretoria se vooraanstaande woonbuurt, vanselfsprekende bevordering in die<br>werk, welvaart en voorspoed. Toe kom die opstande en die grondbesetting. Nou<br>word die Volksrepubliek van Azanië deur Die Party regeer. Alle wit mense is<br>Weskaap toe verban. Dié wat in Azanië wil werk, word toegelaat, maar word<br>onderwerp aan dieselfde vernederende praktyke wat gedurende die<br>Apartheidsjare beoefen is.<br>Paul se vrou en kinders sit in ’n tentekamp in die Kaap, hy bly in ’n hostel en<br>sukkel om sy werk te behou. Paul het egter ’n plan: hy begin met mampoer<br>smokkel. Kort voor lank het hy ’n weldoener en sakevenoot in Thabo Ntombela,<br>mampoerstokers en verspreiders. Besigheid lóóp. Maar in Azanië wil elkeen sy<br>deel hê en ’n wit man soos Paul is so goed soos kroonwild.</p>