Þyrnirós

Flest þekkjum við ævintýrið um Þyrnirós. Kóngur og drottning höfðu lengi átt sér þá ósk heitasta að eignast barn. Þegar undurfögur dóttir þeirra fæðist er blásið til heljarinnar veislu. Til veislunnar bjóða þau völvum ríkisins en þar sem einungis voru til tólf gulldiskar í höllinni var þrettándu völvunni ekki boðið til sætis. Sú varð verulega ill við þessi tíðindi og lagði álög á nýfædda stúlkuna. Á fimmtánda afmælisdegi sínum skyldi hún stinga sig á snældu og falla í dá. Konungur reyndi allt hvað hann gat til að koma í veg fyrir að álög völvunnar rættust en allt kom fyrir ekki. Stúlkan stakk sig á snældu og féll í dá ásamt öllu hirðfólki konungshallarinnar. Í hundrað ár reyndu konungssynir hvaðanæva að úr heiminum að komast að höllinni og frelsa Þyrnirós úr álögum, án árangurs. Allt þar til hinn eini sanni birtist - á hárréttum tíma. Ævintýri Grimmsbræðra eru löngu orðin þekkt um allan heim enda verið þýdd á fleiri hundruð tungumál. Þjóðsögur Grimmsbræðra hafa tekið töluverðum breytingum í aldanna rás án þess þó að missa upprunalegan boðskap sinn og í dag ganga þjóðsögur Jacobs og Wilhelms einfaldlega undir nafninu Ævintýri Grimmsbræðra.