Frå alle kantar ber vinden med seg ord og plantar

Jóanes Nielsens styrke er sanseleg, uslipt metaforikk og skildringar frå arbeidsliv og kjærleiksliv. Metoden hans er kjenneteikna av ekspansjon, oppramsing, laust samanføydde assosiasjonar og ei sjølvframstilling som leier tanken mot Vladimir Majakovskij, Walt Whitman og Pablo Neruda. I 2005 gav Samlaget ut Bruer av svoltne ord av den færøyske forfattaren og poeten Jóanes Nielsen. Nielsen er fødd i 1953. Han debuterte 25 år gammal med diktsamlinga Den trettande månaden i 1978. Han har gitt ut romanar, ei novellesamling, eit skodespel og essaysamlingar. Lars Moa viser her igjen at han er ein god gjendiktar. Utvalet er frå dei fem første diktsamlingane til Nielsen og viser mykje av variasjonen i diktinga hans. Nielsen skriv politiske programdikt som han gjer så jord- og livsnære som mogleg.